විද්යා ඝාතනයේ විත්තිකරුවන් 4 දෙනාටම මරණ දඬුවම ස්ථිරයි
විද්යා නමැති පාසල් සිසුවිය පැහැරගෙන ගොස් සමූහ දූෂණය කර ඝාතනය කිරීමේ චෝදනාවන්ට වරදකරුවන් වී මරණ දඬුවම නියමව සිටි සුවිස් කුමාර ඇතුළු විත්තිකරුවන් සිවු දෙනකුගේ මරණ දඬුවම පංචපුද්ගල ශ්රේෂ්ඨාධිකරණ විනිසුරු මඬුල්ල ඊයේ (06) තහවුරු කළේය.
මෑත ඉතිහාසයේ සිදුවූ ඉතා කෲර සහ අමානුෂිකම සිදුවීම මෙය බව සඳහන් කළ පංචපුද්ගල ශ්රේෂ්ඨාධිකරණ විනිසුරු මඬුල්ල විත්තිකරුවන් සියලු දෙනාටම එරෙහි චෝදනා සාක්කි සහිතව පැමිණිල්ල විසින් ඔප්පු කර ඇති බවත් ඒ අනුව ත්රිපුද්ගල මහාධිකරණ විනිසුරු මඬුල්ලේ තීන්දුව නිවැරදි බවත් තීන්දු කළේය.
සුවිස් කුමාර නමැති විත්තිකරු සමඟ මරණ දඬුවම නියමව සිටි විත්තිකරුවන් දෙදෙනකු අපරාධය සිදු වන අවස්ථාවේදී එම ස්ථානයේ නොසිටි බවට හෙළිවී ඇතැයි තීන්දු කළ පංචපුද්ගල ශ්රේෂ්ඨාධිකරණ විනිසුරු මඬුල්ල එම විත්තිකරුවන් දෙදෙනා නිදොස් කොට නිදහස් කළේය.
සිද්ධිය සම්බන්ධයෙන් චෝදනා ලැබ මරණ දඬුවම නියමවී සිටින සුවිස් කුමාර ඇතුළු සිවු දෙනකුගේ මරණ දඬුවම තහවුරු කළ පංචපුද්ගල ශ්රේෂ්ඨාධිකරණ විනිසුරු මඬුල්ල ඉතිරි විත්තිකරුවන් දෙදෙනා නිදොස් කොට නිදහස් කිරීමට තීන්දු කළේය. චෝදනා ඔප්පු වී නැතැයි තීරණය කරමින් එලෙස නිදොස් කොට නිදහස් කරන ලද්දේ මහලිංගම් සසිදරන් හෙවත් සෂී සහ ජයතරන් කෝකිලර් හෙවත් කන්නන් නමැති විත්තිකරුවන් දෙදෙනාය.
ත්රිපුද්ගල මහාධිකරණ විනිසුරු මඬුල්ල හමුවේ පැවැති දීර්ඝ නඩු විභාගයේදී මහලිංගම් ශෂී කුමාර හෙවත් ‘සුවිස් කුමාර’ නමැති විත්තිකරු ඇතුළු විත්තිකරුවන්ට එරෙහි චෝදනා සනාථ වී ඇතැයි තීන්දු කරමින් ත්රිපුද්ගල මහාධිකරණ විනිසුරු මඬුල්ල විසින් පුබාලසිංහම් ජයකුමාර හෙවත් රවී. තිලනාද චන්ද්රා කාන්තන් හෙවත් චන්ද්රා සහ සියනේතන් තුසිතන් හෙවත් පෙරිය තම්බි නමැති විත්තිකරුවන්ට එරෙහිව පැනවූ මරණ දඬුවම තහවුරු කළේය.
අගවිනිසුරු ප්රීති පද්මන් සුරසේන, අචල වෙංගප්පුලි, ප්රියන්ත ප්රනාන්දු, මේනකා විජේසුන්දර සහ සම්පත් අභයකෝන් මහත්ම මහත්මීන්ගෙන් සැදුම්ලත් පංච පුද්ගල විනිසුරු මඬුල්ල හමුවේ විභාගයට ගත් විශේෂ අභියාචන පෙත්සමේ තීන්දුව ප්රකාශයට පත් කරමින් අදාළ තීන්දුව ප්රකාශයට පත් කළේය. මෙම චෝදනාවන්ට වරදකරු වී සුවිස් කුමාර ඇතුළු විත්තිකරුවන් සමඟ මරණ දඬුවම නියමව සිටි පූබාලසිංගම් හෙවත් සෙන්සිල් නමැති විත්තිකරු පෙත්සම් විභාගය අතරතුර බන්ධනාගාරය තුළදී මියගොස් තිබිණි.
ශ්රේෂ්ඨාධිකරණ විනිසුරුවරුන් වන අචල වෙංගප්පුලි, ප්රියන්ත ප්රනාන්දු, මේනකා විජේසුන්දර සහ සම්පත් අභයකෝන් මහත්ම මහත්මීන්ගේ එකඟත්වයෙන් අගවිනිසුරු ප්රීතී පද්මන් සූරසේන මහතා විසින් මෙම විශේෂ අභියාචන පෙත්සමේ තීන්දුව ප්රකාශයට පත් කරන ලදි. විත්තිකරුවන්ට එරෙහි චෝදනා 41ක් යටතේ ත්රිපුද්ගල මහාධිකරණ විනිසුරු මඬුල්ලක් හමුවේ නඩු පවරා තිබූ බවත් අපරාධයට සම්බන්ධ වී සිට පසුව රජයේ සාක්කිකරුවන් වූ සිද්ධිය ඇසින් දුටු සාක්කිකරුවන් දෙදෙනකු ඇතුළු සාක්කිකරුවන් 36 දෙනකුගේ සාක්කි ත්රිපුද්ගල මහාධිකරණ විනිසුරු මඬුල්ල හමුවේ විමසීමට භාජනය කෙරී ඇති බවත් පංචපුද්ගල විනිසුරු මඬුල්ල සිය තීන්දුවේ සඳහන් කර ඇත.
දැරිය පැහැරගෙන ගොස් දූෂණය කර මරා දැමීම විත්තිකරුවන් විසින් වීඩියෝ පටිගත කර ඇති බවත් මෙම ඝාතන සිද්ධිය පිටුපස දැරියන් පැහැරගෙන ගොස් දූෂණය කිරීමේ සිද්ධීන් වීඩියෝ කර එම වීඩියෝ පට අලෙවි කිරීමේ ජාවාරමක් පැවැති බව සාක්කි මඟින් හෙළි වී ඇති බවත් තීන්දු කළ විනිසුරු මඬුල්ල පළමු, දෙවැනි සහ තෙවැනි විත්තිකරුවන් විද්යා දැරිය පැහැරගෙන, පාළු නිෙවසකට රැගෙන ගොස් ඇයට අතවර කර ඇති බව සාක්කි මඟින් හෙළි වී ඇති බවත් තීන්දු කළේය.
සිද්ධිය හෙළී වීමෙන් පසු ‘සුවිස් කුමාර’ නමැති විත්තිකරු ප්රදේශවාසීන් විසින් අල්ලාගෙන ඔහුට පහරදීමෙන් පසු පොලීසියට භාරදී ඇති නමුත් ජ්යෙෂ්ඨ පොලිස් නිලධාරීන්ගේ සහ දේශපාලනඥයින්ගේ මැදිහත්වීම සහ අනුදැනුම මත ඔහු පොලිස් අත්අඩංගුවෙන් බේරී පලා ගොස් ඇති බව නඩු විභාගයේදී හෙළිව ඇති බවත්, එලෙස පොලිස් අත්අඩංගුවෙන් බේරී පලා ගොස් කොළඹ ප්රදේශයේ සැඟවී සිට ඇත. එහිදී ඔහු යළිත් වරක් පොලිස් අත්අඩංගුවට පත්වී ඇති බවත් තීන්දුවේ සඳහන් කළ පංචපුද්ගල ශ්රේෂ්ඨාධිකරණ විනිසුරු මඬුල්ල, විත්තිකරුවන්ට එරෙහිව ත්රිපුද්ගල මහාධිකරණ විනිසුරු මඬුල්ලක් හමුවේ පැවැති දීර්ඝ නඩු විභාගය අවසානයේදී විත්තිකරුවන්ට එරෙහි සියලු චෝදනාවලට ඔවුන් වරදකරුවන් බවට තීන්දු කරමින් ඔවුන් සියලු දෙනාටම මරණ දඬුවම නියම කර ඇති බවත් තීන්දුවේ සඳහන්ය.
පෙත්සම් විභාගයේදී ඉදිරිපත් වූ කරුණු විශ්ලේෂණය කිරීමේදී ෂිවනාසන් චන්ද්රහසන් සහ සිවනේෂන් තුසිතන් නමැති විත්තිකරුවන් දෙදෙනා සිද්ධිය වන අවස්ථාවේදී අපරාධ ස්ථානයේ නොසිට වෙනත් ස්ථානයක සිටි බවට කරුණු හෙළි වී ඇති බව තීන්දුවේ සඳහන් කළ පංච පුද්ගල ශ්රේෂ්ඨාධිකරණ විනිසුරු මඬුල්ල එම විත්තිකරුවන් දෙදෙනා වරදකාරීත්වයෙන් නිදහස් කිරීමට අධිකරණය තීරණය කළේය.
එම විත්තිකරුවන් දෙදෙනා හැර අනෙකුත් විත්තිකරුවන් සියලු දෙනා විද්යා දැරිය පැහැරගෙන යෑම, දූෂණය කිරීම සහ මරා දැමීමට සම්බන්ධ වී හෝ එම අපරාධයන් සඳහා ආධාර අනුබලදී ඇති බව පැහැදිලි වන්නේ යැයිද ඒ සම්බන්ධයෙන් අදාළ විත්තිකරුවන්ට එරෙහි චෝදනා සාක්කි සහිතව ත්රිපුද්ගල මහාධිකරණ විනිසුරු මඬුල්ල හමුවේ පැමිණිල්ල විසින් ඔප්පු කර ඇතැයි තීන්දු කළ පංචපුද්ගල ශ්රේෂ්ඨාධිකරණ විනිසුරු මඬුල්ල ත්රිපුද්ගල මහාධිකරණ විනිසුරු මඬුල්ලේ තීන්දුව නිවැරදි වන හෙයින් ඒ සඳහා මැදිහත් වීමේ අවශ්යතාවක් නැතැයි ද තීන්දු කළේය.
@දිනමිණ
Discover more from cmn.lk
Subscribe to get the latest posts sent to your email.
