අමෙරිකා ඉරාන ගැටුම් උත්සන්න වෙයි
හෝමූස් සමුද්ර සන්ධියේ යාත්රා කරන වෙළෙඳ නැව් ඉලක්ක කරමින් ඉරාන ආරක්ෂක හමුදාව දිගින් දිගටම පහරදීම හේතුවෙන් සිව්වැනි වරටත් ඉරානයට දැවැන්ත ගුවන් ප්රහාරයක් එල්ල කළ බව අමෙරිකාවේ මධ්යම අණදෙන හමුදා මධ්යස්ථානය නිවේදනය කර තිබේ. හෝමූස් මුහුදේ සිවිල් නැවියන්ට සහ වෙළෙඳ නෞකාවලට ප්රහාර එල්ල කිරීමට ඉරානයට ඇති හැකියාව තවදුරටත් දුර්වල කිරීම අරමුණු කරමින් එම ගුවන් ප්රහාර සිදු කරන බව අමෙරිකාව ප්රකාශ කර ඇතැයි වාර්තා වේ.
ඉරාන විප්ලවීය හමුදාවේ ප්රධාන කඳවුරක් පිහිටි කිෂ්ම් දූපතට සහ ඉරාන හමුදාවේ සන්නිවේදන පද්ධති ඉලක්ක කරමින් එම ප්රහාරය සිදු කර ඇති අතර, දෙරට අතර නැවත යුද ගැටුම් උත්සන්න වීම හේතුවෙන් මැදපෙරදිග කලාපයේ සාමය ස්ථාපිත කිරීම සඳහා පසුගිය මාසයේදී අත්සන් තැබූ අවබෝධතා ගිවිසුම ද අවදානමකට ලක් වී තිබේ. ඉරානයේ වෙරළබඩ නගරය වන බන්දාර් අබ්බාස්, සිරික්, ජාක්ස් ඇතුළු තවත් ස්ථාන රැසක් ද අමෙරිකානු හමුදාවේ ඉලක්ක බවට පත්වී ඇති අතර, එම ප්රහාරවලින් දැවැන්ත පිපිරීම් සිදුවී ඇතැයි විදෙස් මාධ්ය වැඩිදුරටත් වාර්තා කරයි.
අමෙරිකාවේ ප්රහාරවලට ප්රතිප්රහාර එල්ල කිරීමේ ඉරාන උපායමාර්ගික ක්රමවේදයට අනුව පෙරේදා රාත්රියේ සිට වරින් වර කුවේට්, බහරේන්, ජෝර්දාන් සහ ඕමානය රටවල පිහිටි අමෙරිකානු හමුදා කඳවුරුවලට ඉරාන ආරක්ෂක හමුදාව මිසයිල සහ ඩ්රෝන ප්රහාර එල්ල කර ඇතැයි ද වාර්තා වේ.
@දිනමිණ
Discover more from cmn.lk
Subscribe to get the latest posts sent to your email.
