ද්විත්ව ඝාතනයක සුලමුල වසර අටකට පසු හෙළිවෙයි

වසර අටකට පෙර යුද හමුදා සෙබළෙකු පැහැරගෙන ගොස් ඝාතනය කර අතුරුදන් කිරීමේ සිද්ධියක් සම්බන්ධයෙන් අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන හා සංවිධානාත්මක අපරාධ විමර්ශන අංශය තොරතුරු අනාවරණ කරගෙන තිබේ.

ඒ, අත්අඩංගුවට ගෙන රැඳවුම් නියෝග මත රඳවාගෙන සිටින සැකකරුවකුගෙන් සිදුකළ ප්‍රශ්න කිරීම්වලදීය.

අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන හා සංවිධානාත්මක අපරාධ විමර්ශන අංශය විසින් පසුගිය ජූනි මස 8 වැනිදා විදෙස් රටක නිෂ්පාදිත ගිනිඅවියක් හා විවිධ වර්ගයේ ජීව උණ්ඩ තොගයක් සමඟ පුද්ගලයෙකු අත්අඩංගුවට ගෙන තිබුණි.

එහිදී සැකකරුගෙන් සිදුකළ ප්‍රශ්න කිරීම්වලදී අනාවරණ වී ඇත්තේ, මීට වසර 8කට පෙර නිශ්ශංක නමැති බලලත් විශ්‍රාමික හමුදා නිලධාරියෙකු කුරුවිටදී පහරදී ඝාතනය කළ බවයි.

ඒ අදාළ පුද්ගලයාගේ බිරිඳ සමඟ සැකකරු සමීප සබඳතාවක් පැවැත්වීම නිසා බව ඔහු විමර්ශන නිලධාරීන් හමුවේ පවසා ඇත.

අදාළ මළ සිරුර ප්‍රදේශයේ පිහිටි ඉඩමක වළදමා අනතුරුව ප්‍රදේශයේ පිහිටි ගඟකට එය දැමූ බවත් සැකකරු පවසා තිබේ.

ඒ අනුව, සැකකරු අදාළ ස්ථානය ඊයේ විමර්ශන නිලධාරීන්ට පෙන්වා ඇති නමුත් මළ සිරුර මෙතෙක් සොයාගැනීමට නොහැකි වී ඇත.

එමෙන්ම සැකකරු අදාළ සිද්ධිය පිළිබඳව දැන සිටි 25 හැවිරිදි තරුණියක් ඉන්දියාවට රැගෙන ගොස් එහිදී ඝාතනය කර අතුරුදන්කර ඇති බවද ඔහුගෙන් සිදුකළ ප්‍රශ්න කිරීම්වලදී හෙළිකර තිබේ.

අදාළ තරුණිය සමගද ඔහු සමීප සබඳතාවක් පවත්වා ඇති බවයි වාර්තා වෙයි.

සිද්ධිය පිළිබඳ වැඩිදුර පොලිස් විමර්ශන ක්‍රියාත්මකයි.

@sinhala.adaderana.lk