විමල්-දිලිත්-ගම්මන්පිලට එරෙහි නඩුව විභාගයට ත්රිපුද්ගල විනිසුරු මඩුල්ලක්
රාජ්ය බුද්ධි සේවයේ හිටපු අධ්යක්ෂ සුරේෂ් සලේ අත්අඩංගුවට ගෙන රඳවා තබා ගැනීමට එරෙහිව පැවැති විරෝධතා ව්යාපාරයක් අතරතුර පළ කළ අදහස්වලින් අධිකරණයට අපහාසයක් කළැයි කියන හිටපු අමාත්යවරුන් ඇතුළු පිරිසකට එරෙහිව කොටුව මහේස්ත්රාත්වරයා ඉදිරිපත් කළ පැමිණිල්ල ලබන 18 වැනිදා සලකා බැලීමට අභියාචනාධිකරණය ඊයේ 14 තීරණය කළේය. කොටුව මහේස්ත්රාත් පසන් අමරසේන මහතා විසින් හිටපු අමාත්යවරුන් වන විමල් වීරවංශ, උදය ගම්මන්පිල, පාර්ලිමේන්තු මන්ත්රී දිලිත් ජයවීර, හිටපු ජනාධිපති ගෝඨාභය රාජපක්ෂ මහතාගේ පෞද්ගලික ලේකම් සුගීශ්වර බණ්ඩාර, අසංක නවරත්න, කථිකාචාර්ය මහින්ද පතිරණ යන මහත්වරුන්ට එරෙහිව අධිකරණයට අපහාස කිරීම සම්බන්ධයෙන් ඉදිරිපත් වූ පැමිණිල්ල සලකා බැලීමෙන් අනතුරුව අභියාචනාධිකරණය එලෙස තීරණය කළේය.
අධිකරණයට අපහාස කිරීම සම්බන්ධයෙන් කොටුව මහේස්ත්රාත් පසන් අමරසේන මහතා විසින් ඉදිරිපත් කළ අදාළ පැමිණිල්ල
අභියාචනාධිකරණයේ සභාපති විනිසුරු රොහාන්ත අබේසූරිය, චමත් මොරායස් සහ ආදිත්ය පටබැඳිගේ යන මහත්වරුන්ගෙන් සැදුම්ලත් විනිසුරු මඩුල්ලක් හමුවේ විමසා බැලීමට තීරණය කර ඇත.
කොටුව මහේස්ත්රාත්වරයා විසින් ඉදිරිපත් කරන ලද පැමිණිල්ල අභියාචනාධිකරණ සභාපති විනිසුරු රොහාන්ත අබේසූරිය සහ ප්රියන්ත ප්රනාන්දු යන මහත්වරුන්ගෙන් සමන්විත විනිසුරු මඩුල්ල ඉදිරියේ කැඳවනු ලැබූ අවස්ථාවේදී ඒ බව දැනුම් දෙනු ලැබිණි.
මේ අතර අධිකරණයට අපහාස කළ බවට කොටුව මහේස්ත්රාත්වරයා කර ඇති නිගමනය අභියෝගයට ලක් කරමින් පාර්ලිමේන්තු මන්ත්රී දිලිත් ජයවීර මහතා විසින් ගොනුකොට ඇති රිට් පෙත්සම ද කරුණු තහවුරු කිරීම සඳහා ලබන 18 වැනිදා කැඳවන ලෙස අභියාචනාධිකරණය නියෝග කළේය.
අභියාචනාධිකරණ සභාපති විනිසුරු රොහාන්ත අබේසූරිය සහ ප්රියන්ත ප්රනාන්දු යන මහත්වරුන්ගෙන් සමන්විත විනිසුරු මඩුල්ල හමුවේ කැඳවූ අවස්ථාවේදී ඉදිරිපත් වූ කරුණු සලකා බැලීමෙන් අනතුරුව එලෙස නියම කළේය.
පෙත්සම්කාර දිලිත් ජයවීර මහතා වෙනුවෙන් පෙනී සිටි ජනාධිපති නීතිඥ අලි සබ්රි මහතා කරුණු දක්වමින් සිය සේවා දායකයා ප්රවෘත්ති සාකච්ඡාවකදී පළ කළ අදහස්වලින් තෝරා ගත් කොටස් කීපයක් පමණක් අපරාධ පරීක්ෂණ දෙපාර්තමේන්තු නිලධාරීන් විසින් මහේස්ත්රාත්වරයාට ඉදිරිපත් කරමින් සිය සේවාදායකයා අධිකරණයට අපහාසයක් කළ බවට කරුණු ඉදිරිපත් කර ඇතැයි දැනුම් දුන්නේය.
අපරාධ පරීක්ෂණ දෙපාර්තමේන්තු නිලධාරීන් විසින් හිතාමතාම මෙම ක්රියාව කර ඇතැයි පෙන්වා දුන් ජනාධිපති නීතිඥ අලි සබ්රී මහතා අදාළ මාධ්ය සාකච්ඡාවේදී තම සේවාදායකයා රහස් පොලීසියේ ක්රියා කලාපය විවේචනය කළත් අධිකරණයට අපහාස කිරීමක් කර නැතැයි පෙන්වා දුන්නේය.
ඉදිරිපත් වූ කරුණු සලකා බැලූ විනිසුරු මඩුල්ල පෙත්සම ලබන 18 වැනි දින කැඳවන ලෙස නියෝග කළේය.
@දිනමිණ
Discover more from cmn.lk
Subscribe to get the latest posts sent to your email.
