බ්‍රසීල හිටපු ජනාධිපති අමෙරිකාවට පනී
බ්‍රසීල ජනාධිපතිවරණයෙන් පරාජයට පත්වූ ෆ්ලේවියෝ බොල්සොනාරෝ රහසේම අමෙරිකාවට පලාගොස් ඇතැයි විදෙස් මාධ්‍ය වාර්තා කරයි. ඔහු රටින් පිටවී ඇත්තේ එරට ආන්දෝලනයකට තුඩු දුන් ඩොලර් මිලියන 900කට අධික මුදල් විශුද්ධිකරණ චෝදනාවක් සම්බන්ධව සිදු කරන විමර්ශනවලට අදාළව පැය 24ක් ඇතුළත සිය ගුවන් ගමන් බලපත්‍රය පොලීසියට භාර දෙන ලෙස එරට ශ්‍රේෂ්ඨාධිකරණය නියෝග කිරීමෙන් දිනකට පසුව බව වාර්තා වේ.
නියෝගයට අවනත නොවීම හේතුවෙන් ඔහුගේ ගුවන් ගමන් බලපත්‍රය අහෝසි කළ බව පොලීසිය ප්‍රකාශ කර ඇති අතර, ඒ වන විටත් ඔහු රටින් පිටවී සිටි බව විදෙස් මාධ්‍ය වැඩිදුරටත් වාර්තා කරයි. බොල්සොනාරෝ බ්‍රසීලයෙන් පිටවන්නේ නම් ඔහුට වීසා නිකුත් කිරීමට සූදානම් බව පෙරේදා අමෙරිකානු රාජ්‍ය දෙපාර්තමේන්තුව ප්‍රකාශ කර තිබූ අතර, ඊයේ නිවේදනය කර ඇත්තේ ඔහුට සහ පවුලේ සාමාජිකයන්ට වීසා නිකුත් කළ බවය.
බොල්සොනාරෝ, බිරිය හා දියණියන් දෙදෙනා නිසි ගමන් බලපත්‍ර සහ ලේඛන සහිතව පෙරේදා රාත්‍රියේ දේශසීමා මාර්ගයක් ඔස්සේ අජෙන්ටිනාවට ඇතුළු වූ බව එරට ආගමන හා විගමන දෙපාර්තමේන්තුව සඳහන් කර තිබේ. ඔවුන් අනතුරුව පෞද්ගලික ජෙට් යානයකින් ඉක්වදෝරය බලා ගොස් ඇතැයි ද ආජෙන්ටිනාවේ බලධාරීන් වැඩිදුරටත් ප්‍රකාශ කර තිබේ.
විදෙස් මාධ්‍ය සඳහන් කර ඇත්තේ බොල්සොනාරෝ සහ පවුලේ සාමාජිකයන් ඉක්වදෝරයේ සිට ගුවන් මඟින් අමෙරිකාවට සේන්දු වී ඇති බවය. බොල්සොනාරෝ බ්‍රසීලයේ සිට අමෙරිකාවට පැමිණි ගමන් මාර්ගය පිළිබඳ මෙතෙක් නිවැරදි තොරතුරු අනාවරණය නොවූවද, ඔහු ෆ්ලොරීඩා නුවරදී සිය බාල සොහොයුරු එඩුවාර්ඩෝ මුණ ගැසී ඇතැයි විදෙස් මාධ්‍ය සඳහන් කරයි.
චෝදනාවලින් නිදහස්වීමට රට තුළ රැඳී සිටීම වෙනුවට හොර රහසේම රටින් පලායෑම ලජ්ජාසහගත ක්‍රියාවක් බව බොල්සොනාරෝගේ පලායෑම දැඩි ලෙස විවේචනයට ලක් කරමින් ජනාධිපති ලුලා ද සිල්වා සඳහන් කර ඇති අතර, අමෙරිකානු ජනාධිපති ඩොනල්ඩ් ට්‍රම්ප් ප්‍රකාශ කර ඇත්තේ ඔහුගේ පැමිණීම පිළිගන්නා බවය. කෙසේ වෙතත් මේ වන විට එම සිදුවීම අමෙරිකාවේ දැඩි ආන්දෝලනයකට ලක්වී තිබේ.
එරට ඩිමොක්‍රටික් පක්ෂයේ නියෝජිත ජෝකින් කැස්ත්‍රෝ සඳහන් කර ඇත්තේ මැතිවරණයෙන් පරාජය වීම අමෙරිකාවෙන් දේශපාලන සරණාගතභාවය ලැබීමට හේතුවක් නොවන බවය. බ්‍රසීල නීතියට පටහැණිව ක්‍රියා කිරීම හේතුවෙන් අධිකරණය හමුවේ චෝදනා ලබා සිටින පුද්ගලයකුට රැකවරණය දීම සම්බන්ධව ට්‍රම්ප් පරිපාලනය කොංග්‍රස් මණ්ඩලය හමුවේ කරුණු දැක්විය යුතු බව ද ඔහු අවධාරණය කර තිබේ.
2022 ජනාධිපතිවරණයේ ලුලා ද සිල්වාගේ ජයග්‍රහණය වෙනස් කිරීමට කුමන්ත්‍රණය කිරීමේ චෝදනාවට මේ වන විට නිවාස අඩස්සියේ පසුවන හිටපු ජනාධිපති ජේවියර් බොල්සොනාරෝගේ වැඩිමහල් පුත්‍රයා වන දක්ෂිණාංශික අපේක්ෂක 45 හැවිරිදි ෆ්ලේවියෝ මෙවර ජනාධිපතිවරණයේදී ලූලා හමුවේ පරාජයට පත්වූයේ වැඩි ඡන්ද ලක්ෂ 44කිනි. මුදල් විශුද්ධිකරණ චෝදනාවට අමතරව බදු වංචා කිරීම්, විවිධ ව්‍යාපාරිකයන්ගෙන් නීතිවිරෝධි ලෙස අරමුදල් එක්රැස් කිරීම්, රාජ්‍ය මුදල් අවභාවිත කරමින් චොකලට් ව්‍යාපාර සහ නිවාස හා ඉඩම් මිලදී ගැනීමේ ව්‍යාපාර සම්බන්ධයෙන් ද ඔහුට චෝදනා එල්ල වී ඇතැයි වාර්තා වේ.
@දිනමිණ
Discover more from cmn.lk
Subscribe to get the latest posts sent to your email.
