‘ස්ටයික්ස්’ නිරය මැදපෙරදිගට ගෙන ඒමට නෙතන්යාහු ට්‍රම්ප්ට බල කරයි

(සාගර දියගම)

ඇමරිකානු එක්සත් ජනපදයේ ප්‍රකට දේශපාලන විචාරකයකු වන ටකර් කාල්සන් විසින් තබන ලද එක් ආන්දෝලනාත්මක ‘X’ සටහනකින්, සමස්ත ලෝකයම මේ වන විට දැඩි කම්පනයකට සහ භීතියකට පත්ව තිබේ.

ඊශ්‍රායල අගමැති බෙන්ජමින් නෙතන්යාහුගේ දැඩි බලපෑම සහ පෙළඹවීම මත, ට්‍රම්ප් පාලනාධිකාරිය විසින් ඉරානයට එරෙහිව න්‍යෂ්ටික ප්‍රහාරයක් එල්ල කිරීමට තව දින කිහිපයක් වැනි කෙටි කාලයක් පමණක් ඉතිරිව තිබිය හැකි බවට, ඔහු එම ආන්දෝලනාත්මක හෙළිදරව්ව හරහා ලොවටම ප්‍රකාශ කළා..

ඉරානයේ මධ්‍යම ප්‍රදේශයේ පිහිටි පිකැක්ස් කන්ද නැමැති භූගත පරිශ්‍රය තුළ ඉරානය විසින් නැවත වරක් සිය න්‍යෂ්ටික වැඩසටහන් ආරම්භ කර ඇති බවට ඊශ්‍රායල බුද්ධි අංශ ප්‍රකාශ කරනවා.. නමුත් මෙහි ඇති තාක්ෂණික සහ හමුදාමය ගැටලුව වන්නේ කුමක්ද?

මෙම න්‍යෂ්ටික මධ්‍යස්ථානය පිහිටා තිබෙන්නේ අඩි 300ක් තරම් ඝනකම් ඇති ස්වාභාවික ග්‍රැනයිට් පාෂාණ තට්ටුවකට යටින් පිහිටි භූගත උමං මාර්ග තුළයි.

ඇමරිකානු ආයුධ ගබඩාවේ ඇති කිසිදු සම්ප්‍රදායික බෝම්බයකට හෝ අවියකට මෙම අඩි 300ක ඝන ග්‍රැනයිට් තට්ටුව විදගෙන ගොස් අභ්‍යන්තරයේ ඇති උමං මාර්ග සහ න්‍යෂ්ටික පහසුකම් විනාශ කිරීමේ හැකියාවක් නැහැ..

එබැවින්, මෙම ඉලක්කය සම්පූර්ණයෙන්ම විනාශ කිරීමට ඇමරිකාව හමුවේ ඇති එකම හමුදාමය විකල්පය වන්නේ, න්‍යෂ්ටික ප්‍රහාරයක් එල්ල කිරීම පමණයි.

ඊශ්‍රායල අගමැති නෙතන්යාහු අතිශය දැඩි ලෙස ඇමරිකාවෙන් ඉල්ලා සිටින්නේ මෙම න්‍යෂ්ටික ප්‍රහාරය එල්ල කරන ලෙසය.

කාල්සන් පවසන පරිදි, නෙතන්යාහු සෑම දිනකම වාගේ ට්‍රම්ප්ට දුරකථනයෙන් අමතමින්, මෙම ප්‍රහාරය එල්ල කරන ලෙස දැඩි ලෙස බලපෑම් කරමින් සිටිනවා..

අප මෙම දේශපාලන පසුබිම දෙස මඳක් විශ්ලේෂණාත්මකව බැලිය යුතුයි. නෙතන්යාහු මෙතරම් දැඩි ලෙස න්‍යෂ්ටික යුද්ධයක් උදෙසා පෙනී සිටින්නේ මන්ද?

ඊශ්‍රායලයේ පැවැති මැතිවරණ ප්‍රතිඵල වලින් පසුව නෙතන්යාහු සිටින්නේ දේශපාලනික වශයෙන් අතිශය අසරණ, කෙළවරකට කොටු වූ තත්ත්වයකයි.

ට්‍රම්ප් ඊශ්‍රායල දේශපාලනයට ඍජුවම මැදිහත් වී අනෙකුත් දේශපාලන පක්ෂ සමඟ සාකච්ඡා කර ඊශ්‍රායල පාර්ලිමේන්තුවේ ආසන 61ක බහුතරයක් ලබා ගැනීමට නෙතන්යාහුට උපකාර නොකළහොත්, ඔහුට නව රජයක් පිහිටුවීමට කිසිසේත්ම හැකියාවක් නැහැ.

අගමැති ධුරය අහිමි වීම යනු නෙතන්යාහුට හුදෙක් බලය අහිමි වීම පමණක් නොවේ. එයින් අදහස් වන්නේ, ප්‍රසිද්ධියේ නින්දාවට පත්වීම, ඔහුට එරෙහිව ඇති බරපතල දූෂණ චෝදනා සම්බන්ධයෙන් පරීක්ෂණ ආරම්භ වීම හා අවසානයේදී සිරගත වීමට පවා සිදුවීමයි.

එබැවින්, අගමැති පුටුව රැක ගැනීමට නම් නෙතන්යාහුට ට්‍රම්ප්ව තමා වෙත තදින්ම ලං කර තබා ගැනීමට සිදුව තිබෙනවා.. ඔහුට තමාගේ පෞද්ගලික සහ දේශපාලනික ගැලවීම වෙනුවෙන් මෙම යුද්ධය අනිවාර්යයෙන්ම අවශ්‍ය වී තිබෙනවා.

මේ සඳහා නෙතන්යාහු සිය සමීපතම මිතුරන් වන ඇමරිකානු පාලනාධිකාරියේ ඉහළම නිලධාරීන්ට උපරිම බලපෑමක් එල්ල කරමින් සිටිනවා. වඩාත්ම කනගාටුදායක කරුණ නම්, ඩිමොක්‍රටික් පක්ෂයේ නායකයන් පවා මෙයට වක්‍රව සහාය පළ කිරීමයි.

හිටපු ජනාධිපති බරැක් ඔබාමා පවා දෝහා නුවරදී මේ දිනවල කෙටුම්පත් කෙරෙමින් පවතින ඉරාන සාම ගිවිසුමට තමා විරුද්ධ බව මෑතක පැවැති සාකච්ඡාවකදී ප්‍රකාශ කර තිබෙනවා.

ඇමරිකාවේ සහ ඊශ්‍රායලයේ මෙම තීරණ හමුවේ මැදපෙරදිග පිහිටි ඇමරිකාවේ අනෙකුත් පැරණි මිත්‍ර රටවල් සිටින්නේ දැඩි භීතියකට පත්වය. තවත් යුද්ධයක් ඇති වුවහොත් තමන්ගේ පැවැත්මට සිදුවන්නේ කුමක්ද යන්න පිළිබඳව ඔවුන් බියෙන් පසුවෙනවා..

පසුගිය සැප්තැම්බර් 27 වැනිදා නෙතන්යාහු රහසිගතව අබුඩාබි නුවර වෙත පියාසර කළේ, ඉක්මන් ප්‍රහාරයක් සඳහා එක්සත් අරාබි එමීර් රාජ්‍යයේ සහාය ලබා ගැනීමටයි.

නමුත් එමීර් රාජ්‍යය එම ඉල්ලීම සෘජුවම ප්‍රතික්ෂේප කළා.. ඊට හේතුව කුමක්ද?

මාස අටකට අධික කාලයක් තිස්සේ පවතින මෙම ගැටුම් නිසා ගල්ෆ් කලාපයේ ආර්ථිකයන් මේ වන විටත් අගාධයකට වැටෙමින් පවතිනවා.. ගෝලීය බලශක්ති සහ පොහොර වෙළඳපොළ දැඩි ලෙස කඩාවැටී ඇති අතර, ඒවා ආපසු යථා තත්ත්වයට පත්වීමට දීර්ඝ කාලයක් ගතවනු ඇත.

සමස්ත ලෝකයටම තෙල් ප්‍රවාහනය කිරීම සඳහා භාවිතා කරන්නේ ‘සුපර් ටෑන්කර්’ නැමැති සුවිශාල තෙල් නැව් 850ක් පමණයි. නමුත් ඔක්තෝබර් මාසයේදී පමණක් හෝමුස් සමුද්‍ර සන්ධිය තුළදී ඉන් තෙල් නැව් 11ක් දැඩි ලෙස ප්‍රහාරයන්ට ලක්ව විනාශ වී තිබෙනවා.

ඒ නිසා මේ යන වේගයෙන් ඉදිරියට ගියහොත්, ලෝක ව්‍යාප්ත දැවැන්ත ආර්ථික අවපාතයක් ඇතිවීම වැළැක්විය නොහැක!

න්‍යෂ්ටික ප්‍රහාරයක් එල්ල වුවහොත්, මෙම විනාශය සිය දහස් ගුණයකින් වේගවත් වනු නිසැකය. පිකැක්ස් කන්දට එල්ල කරන භූගත න්‍යෂ්ටික ප්‍රහාරයකින් පිටවන විකිරණශීලී පස් සහ දූවිලි පර්සියානු කලාපය පුරා පැතිරී යනු ඇත.

එහි භයානකම ප්‍රතිඵලය කලාපයේ ජීවත්වන ජනතාවගෙන් මිලියන 100කට අධික සංඛ්‍යාවකගේ පානීය ජල මූලාශ්‍ර සම්පූර්ණයෙන්ම විෂ වීමයි. මෙය පුරාණ ග්‍රීක පුරාවෘත්තවල සඳහන් ‘ස්ටයික්ස්’ නිරය මැදපෙරදිගට ගෙන ඒමකි.

ලෝක ඉතිහාසයේ යුද්ධයකදී න්‍යෂ්ටික ආයුධ භාවිතා කර ඇත්තේ ඇමරිකා එක්සත් ජනපදය පමණයි. ඒ 1945 දී හිිරෝෂිමා සහ නාගසාකි වෙතය. ඉන් පසුව කිසිදු රටක් න්‍යෂ්ටික අවි භාවිතා කර නැත.

නමුත්, ඇමරිකාව නැවත වරක් ඉරානයට එරෙහිව න්‍යෂ්ටික අවි භාවිතා කළහොත්, එය මුළු ලෝකයටම භයානක පූර්වාදර්ශයක් සපයනු ඇත!

රුසියාව මේ වන විටත් අවම වශයෙන් විදේශීය රජයන් දෙකකටම දැනුම් දී ඇත්තේ, ඇමරිකාව ඉරානයට න්‍යෂ්ටික ප්‍රහාරයක් එල්ල කළහොත්, තමන්ටද යුක්‍රේනයට එරෙහිව න්‍යෂ්ටික ආයුධ භාවිතා කිරීමට සම්පූර්ණ නිදහස හිමිවන බවයි.

අපේ අසල්වැසි න්‍යෂ්ටික බලවතුන් වන ඉන්දියාව සහ පාකිස්ථානය එකිනෙකාට එරෙහිව න්‍යෂ්ටික අවි යොදා ගැනීමට පෙළඹෙනු ඇත!

උතුරු කොරියාව විසින් දකුණු කොරියාවේ සෝල් අගනුවර වෙත න්‍යෂ්ටික ප්‍රහාර එල්ල කිරීමට මෙය ක්ෂණික හේතුවක් කර ගනු ඇත. පළමු න්‍යෂ්ටික ප්‍රහාරය එල්ල වූ සැනින්, තුන්වැනි ලෝක යුද්ධය වැළැක්විය නොහැකි වනු ඇත!

එහෙත් එම යුද්ධය අතිශය කෙටි එකක් වන අතර, එය සමස්ත මානව සංහතියේම අවසානය සනිටුහන් කරනු ඇත!

ඇමරිකානුවන් නොදැනුවත්වම පසුගිය පෙබරවාරි මාසයේ සිට ඇමරිකානු පාලනාධිකාරිය විසින්, ඇමරිකාවේ න්‍යෂ්ටික ප්‍රතිපත්තිය රහසිගතව සංශෝධනය කර තිබෙනවා. ඒ අනුව, “තක්‍ෂණික න්‍යෂ්ටික අවි” ප්‍රථමයෙන්ම භාවිතා කිරීම පහසු වන පරිදි නීති ලිහිල් කර ඇත.

වොෂින්ටනයේ සිටින ඩිමොක්‍රටික් හෝ රිපබ්ලිකන් පක්ෂයේ කිසිදු දේශපාලනඥයෙකු, මෙම බිහිසුණු නීති වෙනස පිළිබඳව කතා කිරීමට හෝ විරෝධය පෑමට ඉදිරිපත් වී නැත!

තීරණාත්මක දිනය නොවැම්බර් 7!

දේශපාලන විශ්ලේෂකයන්ගේ තොරතුරු වලට අනුව, ට්‍රම්ප් විසින් මෙම න්‍යෂ්ටික ප්‍රහාරය එල්ල කරන්නේද නැද්ද යන්න පිළිබඳ අවසන් තීරණය, නොවැම්බර් 07 වන දිනට පෙර ගැනීමට නියමිතය.

කෙසේ වෙතත් යම් තරමක හෝ සැනසුම් සුසුමක් හෙළිය හැකි කරුණක් වන්නේ, ට්‍රම්ප් තවමත් මෙම තීරණය ගැනීමට මැලිබවක් දැක්වීමයි.

අපේ රටේ ​බොහෝ දෙනෙකු සිතනු ඇත්තේ “මේක මැදපෙරදිග යුද්ධයක්, අපිට මොකද?” කියාය. නමුත් වික්ටර් හියුගෝ පවසන පරිදි, “මානව සංහතිය යනු එකම පවුලකි. එහි එක් අන්තයකට වදින පහරක් මුළු සිරුරටම දැනේ..” න්‍යෂ්ටික ප්‍රහාරයක් නිසා තෙල් නැව් ගමනාගමනය නතර වීමෙන් ලෝක වෙළඳපොලේ තෙල් මිල අහස උසට යනු ඇත.

එසේම ගෝලීය පොහොර වෙළඳපොළ බිඳ වැටීම නිසා කෘෂිකාර්මික නිෂ්පාදන පහත වැටී, ලංකාව තුළ දැවැන්ත ආහාර හිඟයක් සහ උද්ධමනයක් ඇති විය හැක. තවද, මැදපෙරදිග කලාපයේ ලක්ෂ සංඛ්‍යාත ශ්‍රී ලාංකිකයන් සේවය කරයි. විකිරණශීලී දූෂණය සහ ජල අර්බුදය නිසා ඔවුන්ගේ ජීවිත දැඩි අවදානමකට ලක්වේ. මෙවැනි න්‍යෂ්ටික යුද්ධයකදී කිසිදු කෙනෙකුට “මම ලාංකික හෝ විදේශීය” කියා බේරීමට හැකියාවක් නැත. විකිරණශීලී කාන්දුවීම් මුළු ලෝකය පුරාම පැතිරෙනු ඇත.

අවසානයේ, ​අපට අද ජීවත් වීමට සිදුව ඇත්තේ හෝමර්ගේ ‘ඉලියාඩ්’ මහා කාව්‍යයේ එන ට්‍රෝයි නගරයේ අවසාන දිනවල මෙන්, දැඩි බියකින් සහ අවිනිශ්චිතතාවයකිනි!