ඉරාන ජනාධිපතිගේ හෙලිකොප්ටර් අනතුර සියැසින් දුටු ගෝලම් හුසේන්
ඉරාන ජනාධිපති ඊබ්‍රහිම් රයිසි ගමන් ගත් හෙලිකොප්ටරය අතුරුදන්වීම සියැසින් දුටු බව ජනාධිපති කාර්ය මණ්ඩලයේ ප්‍රධානී ගෝලම් හොසේන් ප්‍රකාශ කර ඇත.
ඉරාන රජයේ රූපවාහිනි නාලිකාව සමඟ සම්මුඛ සාකච්ඡාවකට එක්වෙමින් ඔහු මේ බව සඳහන් කර තිබේ. අසර්බයිජාන් දේශසීමාවේ වේල්ල විවෘත කිරීමේ උත්සවයට ජනාධිපතිවරයා ගමන් කළ හෙලිකොප්ටරය මැදි කරමින් තවත් හෙලිකොප්ටර් දෙකක් ගමන් කර තිබූ අතර, කාර්ය මණ්ඩල ප්‍රධානියා ගමන් කර ඇත්තේ තුන්වැනි හෙලිකොප්ටරයේ බව ද වාර්තා වේ. වේල්ල විවෘත කිරීමෙන් පසු ජනාධිපතිවරයා ඇතුළු පිරිස දිවා නැමදුමට එක්වූ බවත්, අනතුරුව ටබ්රිස් බලා පිටත්ව වූ බවත් සඳහන් කර ඇති කාර්ය මණ්ඩල ප්‍රධානි ඒ වනවිට යහපත් කාලගුණ තත්ත්වයක් පැවැති බව ද ප්‍රකාශ කර තිබේ. එහෙත් පැය භාගයකට පමණ පසු වර්සකාන් ප්‍රදේශයේ පිහිටි සන්ගන් තඹ ආකාරයට ඉහළින් පියාසර කරමින් සිටියදී ඉදිරියෙන් ඝන වලාකුළු තිබුණු බව ඔහු වැඩිදුරටත් සඳහන් කර තිබේ. හෙලිකොප්ටර් යානා ත්‍රිත්වයටම අණදෙන නිලධාරියා ලෙස කටයුතු කර ඇති ජනාධිපතිවරයා සමඟ අනතුරින් මිය ගිය එම හෙලිකොප්ටර් යානයේ නියමුවා වන අතර, ඔහු සෙසු නියමුවන්ට උපදෙස් දී ඇත්තේ එම ඝන වලාකුළුවලට ඉහළින් පියාසර කරන ලෙසටය. කාර්ය මණ්ඩල ප්‍රධානියා සිටි හෙලිකොප්ටරය පියාසර කර ඇත්තේ ජනාධිපතිවරයාගේ හෙලිකොප්ටරයට පසුපසින් ගමන් කළ හෙලිකොප්ටරයට පසුපසින් බවද වාර්තා වේ. ප්‍රධාන නියමුවාගේ උපදෙස් ලැබී තත්ත්පර 30ක් ඇතුළත ඔහු ගමන් ගත් හෙලිකොප්ටරය ඉහළට ඔසවා ඇති අතර, ජනාධිපතිවරයා ගමන් ගත් හෙලිකොප්ටරය අතුරුදන් වී ඇති බව ඒ මොහොතේදිම නියමුවා සහ කාර්ය මණ්ඩල ප්‍රධානියා ඇතුළු පිරිසට අවබෝධ වී ඇත. ඝන වලාකුළුවලට ඉහළින් පියාසර කළ බැවින් ඉදිරියෙන් පියාසර කළ ජනාධිපතිවරයා රැගත් හෙලිකොප්ටරයට සිදුවූයේ කුමක්දැයි නොදුටු බව ද කාර්ය මණ්ඩල ප්‍රධානියා වැඩිදුරටත් සඳහන් කර ඇත.
පසුව අතුරුදන් වූ හෙලිකොප්ටරය ගැන සොයා බැලීමට ඔවුන්ගේ හෙලිකොප්ටරය ආපසු හරවා ඇති අතර, ඒ වනවිට ජනාධිපතිවරයා ගමන් ගත් හෙලිකොප්ටරය සමඟ සියලු සම්බන්ධතා බිඳවැටී තිබූ බව ද ඔහු සඳහන් කර ඇත.
‘අපි හිතුවේ ඔවුන් හදිසි ගොඩබැස්මක් සිදු කරන්නට ඇති කියලයි. ජනාධිපතිවරයා ගමන් කළ හෙලිකොප්ටරය අවසන් වතාවට අපේ නියමුවා සමඟ සම්බන්ධ වී තිබුණේ ඝන වලාකුළු මඟ හැරීමට යානය ඉහළට ඔසවන ලෙස උපදෙස් දුන් අවස්ථාවේදී පමණයි. ඒ වනවිට සම්බන්ධතාව බිඳ වැටිලා තත්පර 90ක් විතර ගතවෙලා තිබුණා. ජනාධිපතිවරයා ගිය හෙලිකොප්ටර් යානයට මොකද වුණේ බලන්න අපේ නියමුවා වට දෙකක්ම හෙලිකොප්ටරය රැගෙන ගියා. ඝන වලාකුළු තිබුණු තැනට යෑම අවදානම් නිසා එතැනට ගියේ නෑ. ඒ අතරතුරත් අපි ඔවුන්ගේ ජංගම දුරකතනවලට ඇමතුම් ගන්න නොකඩවා උත්සාහ ගත්තා. ඒත් කිසිකෙනෙක් ප්‍රතිචාර දැක්වුයේ නෑ. පස්සේ වැඩිදුරට සොයා බලන්න අපි වහාම සන්ගන් තඹ ආකාරය තිබුණු තැනට හෙලිකොප්ටරය ගොඩ බැස්සුවා.‘ ජනාධිපති කාර්ය මණ්ඩල ප්‍රධානියා වැඩිදුරටත් ප්‍රකාශ කර තිබේ.
අනතුරුව ඔහු ජනාධිපතිවරයා ගමන් ගත් හෙලිකොප්ටරයේ ප්‍රධානියාගේ ජංගම දුරකතනයට ඇමතුමක් ගෙන ඇති අතර, ඊට පිළිතුරු දී ඇත්තේ අනතුරින් පසු පැය 18ක්ම ජීවතුන් අතර සිටි ටබ්රිස් පළාතේ ප්‍රධාන පූජකවරයා විසිනි.
ඉතා අසිරුවෙන් පිළිතුර දී ඇති ප්‍රධාන පූජකවරයා සිදුවූයේ කුමක්දැයි නොදන්නා බවත්, සිටින ස්ථානය ගැන පැහැදිලි අවබෝධයක් නැති බවත් සඳහන් කර ඇත. එහෙත් අවට පරිසරය පුරා ගස්වැල් පෙනෙන බව ද ඔහු පවසා ඇත. හෙලිකොප්ටරයේ ගමන් ගත් ජනාධිපතිවරයා හෝ සෙසු පුද්ගලයන් ගැන කිසිවක් නොදන්නා බවත්, ඔවුන් පෙනෙන්නට නොමැති බවත් පූජකවරයා වැඩිදුරටත් ප්‍රකාශ කර තිබේ.
තම හෙලිකොප්ටරය ගොඩ බැස්වූ සන්ගන් තඹ ආකාරය සතුව ගිලන් රථ ඇතුළු වාහන කිහිපයක් තිබූ බැවින් වහාම ජනාධිපතිවරයා ඇතුළු පිරිස ගැන සොයා බැලීමට කණ්ඩායමක් පිටත් කළ බව ජනාධිපති කාර්ය මණ්ඩලයේ ප්‍රධානි ගෝලම් හොසෙන් එම සම්මුඛ සාකච්ඡාවේදී වැඩිදුරටත් සඳහන් කර තිබේ. අනතුරුව ඔහු එම සිදුවීම පිළිබඳ රජයේ ප්‍රධානින්ට දැනුම් දී ඇතැයි ද වාර්තා වේ.
@දිනමිණ
