ඊශ්‍රායලයට පහරදීම ත්‍රස්ත ක්‍රියාවක්- ඉන්දීය විදේශ ඇමැති ජයිශංකර්
හමාස් සංවිධානය පසුගිය වසරේ ඔක්තෝබර් 7 වැනිදා ඊශ්‍රායලයට පහරදීම ත්‍රස්ත ක්‍රියාවක් බවත්, ත්‍රස්තවාදයට ගොදුරු වන ඕනෑම රටක් ප්‍රතිචාර දක්වන බවත් ඉන්දීය විදේශ ඇමති එස්.ජයිශංකර් ප්‍රකාශ කර ඇතැයි විදෙස් මාධ්‍ය වාර්තා කළේය. මහාරස්ට්‍ර ප්‍රාන්තයේ නෂීක් දිස්ත්‍රික්කයේ පැවැති ‘විශ්වබන්දු භාරත්‘ නමැති සංවාදයකට එක්වෙමින් ඉන්දීය විදේශ ඇමැතිවරයා මේ ප්‍රකාශය සිදු කර ඇතැයි වැඩිදුරටත් වාර්තා වේ.
ඊශ්‍රායල – හමාස් යුද්ධය පිළිබඳ ප්‍රකාශයක් නිකුත් කිරීමට සූදානම් නැති බව ඉන්දීය විරුද්ධ පක්ෂය ප්‍රකාශ කර ඇති බවත්, එවැනි ප්‍රකාශයක් සිදු කිරීම ඔවුන්ගේ මැතිවරණ ව්‍යාපාරයට බලපානු ඇතැයි උපකල්පනය කරමින් කිසිදු ප්‍රකාශයක් සිදු කිරීමෙන් වැළකී සිටින බවත් විදේශ ඇමැතිවරයා වැඩිදුරටත් සඳහන් කර තිබේ.
හමාස් සංවිධානයේ ත්‍රස්ත ප්‍රහාරයට ප්‍රතිචාර දැක්වුවද, ඉන් සිවිල් වැසියන්ට හානියක් නොවිය යුතු බවත්, සිය රට වෙනුවෙන් පලස්තීනයට විසඳුමක් සොයා ගත යුතුව ඇති බවත් ජයිශංකර් එම සංවාදයේදී වැඩිදුරටත් සඳහන් කර තිබේ.
@දිනමිණ
