ගෝලීය සමාගම් සතු රුසියානු වත්කම් අත්පත් කර ගැනීමට පුටින් නියෝග කරයි

රුසියානු සිවිල් හා ආර්ථිකයට එරෙහිව යුක්රේනය එල්ල කරන ප්‍රහාරවලට බටහිර රටවල් ලබා දෙන සහයෝගය හේතුවෙන්, ප්‍රසිද්ධ බහුජාතික සමාගම් වන Nestlé, Auchan සහ Leroy Merlin යන සමාගම්වල රුසියානු අනුබද්ධ ආයතන තාවකාලික පාලනය යටතට පත් කිරීමට රුසියානු ජනාධිපති ව්ලැඩිමීර් පුටින් නියෝග කර තිබේ. රුසියාවෙන් බටහිර සමාගම් ඉවත්ව යාම සහ විදේශයන්හි රුසියානු රාජ්‍ය හා පුද්ගලික වත්කම් අත්පත් කර ගැනීමට ප්‍රතිචාර වශයෙන් මොස්කව් රජය විසින් 2023 වසරේදී මෙම තාවකාලික කළමනාකරණ යාන්ත්‍රණය හඳුන්වා දෙන ලදී.

මෙම පියවර පිටුපස ඇති ප්‍රධාන හේතුව ලෙස ක්‍රෙම්ලින් ප්‍රකාශක itri Peskov පවසා ඇත්තේ, මෙම සමාගම්වල මව් රටවල් කීව් රජයට සහාය දැක්වීම සහ ‘මිත්‍රශීලී නොවන රටවල්’ ලෙස සැලකෙන යුරෝපීය ජාතීන් රුසියාවට එරෙහි යුධ ක්‍රියාමාර්ගවලට සක්‍රීයව දායක වීමයි. විශේෂයෙන්ම ප්‍රංශය යුක්රේනයට ප්‍රධාන මට්ටමේ යුධ ආධාර සපයන අතර, ස්විට්සර්ලන්තය යුරෝපා සංගමයේ රුසියානු විරෝධී සම්බාධකවලට අනුබල දී ඇත.

මෙම සමාගම් තෝරා ගැනීමට හේතු වී ඇත්තේ ඒවා ප්‍රංශයට සහ ස්විට්සර්ලන්තයට සම්බන්ධ වීමයි. Auchan සහ Leroy Merlin යන සමාගම් ප්‍රංශයේ Mulliez පවුලට අයත් වන අතර, ඒවායේ ගෝලීය ආදායමෙන් සැලකිය යුතු ප්‍රතිශතයක් රුසියානු වෙළඳපොළෙන් ජනනය වේ. Nestle සමාගමට රුසියාව තුළ ඇති වෙළඳපොළ නිරාවරණය සාපේක්ෂව අඩු වුවද, එහි වාර්ෂික ආදායම බිලියන ගණනක් වේ. රුසියානු බලධාරීන් පවසන පරිදි මෙම සියලු වත්කම් ‘L.E.V. Management’ නමැති ව්‍යාපාරික උපදේශන ආයතනය වෙත පවරා ඇත.

මෙම වත්කම් අත්පත් කර ගැනීමත් සමඟ අදාළ සමාගම් ප්‍රතිචාර දක්වමින් කියා සිටියේ, රුසියානු බලධාරීන්ගෙන් මෙතෙක් නිල දැනුම්දීමක් ලැබී නොමැති බවත්, තත්ත්වය සහ ඉදිරි පියවරයන් සමාලෝචනය කරමින් පවතින බවත්ය. 2023 වසරේ රෙගුලාසිවලට අනුව, මෙලෙස තාවකාලික කළමනාකාරීත්වයට පත් කරන විදේශීය වත්කම්වල හිමිකාරීත්වය හිමිකරුවන්ට ස්වයංක්‍රීයව අහිමි නොවන අතර, අනාගතයේදී තත්ත්වය මත පදනම්ව ඒවා සම්බන්ධයෙන් තීන්දු තීරණ ගැනීමට රුසියානු රජය අපේක්ෂා කරයි.

@දිනමිණ