ඊශ්‍රායෙල් මැතිවරණ ප්‍රතිඵලය – නෙතන්යාහු බරපතල පසුබෑමක

ඊශ්‍රායල මහ මැතිවරණයේ පිටවී ඇති ඡන්ද ප්‍රතිඵල අනුව අගමැති බෙන්ජමින් නෙතන්යාහුගේ පාර්ශ්වයට පසුබෑමක් පෙන්නුම් කර ඇති අතර, කිසිදු පාර්ශ්වයකට පැහැදිලි බහුතර බලයක් හිමි නොවන තත්ත්වයක් මතුව තිබේ.

කෙසේ වෙතත්, ප්‍රතිවාදී නායක ගාඩි අයිසන්කොට්ගේ සන්ධාන කණ්ඩායමට ආසන දෙකක වාසියක් හිමිව ඇති බව ඊශ්‍රායලයේ ප්‍රධාන රූපවාහිනී නාලිකා තුනක් විසින් යාවත්කාලීන කරන ලද ඡන්ද ප්‍රතිඵලවලින් අනාවරණය වී ඇත.

එම ප්‍රක්ෂේපණ අනුව, අයිසන්කොට්ගේ කණ්ඩායමට ආසන 52ක් ද, නෙතන්යාහුගේ ලිකුඩ් පක්ෂය ප්‍රමුඛ කණ්ඩායමට ආසන 50ක් ද හිමිවනු ඇතැයි අපේක්ෂා කෙරේ. ඉතිරි ආසන 18 අරාබි පක්ෂ වෙත හිමිවනු ඇතැයි ද එම ප්‍රතිඵලවලින් පෙන්වා දී තිබේ.

කෙසේ වෙතත්, අරාබි පක්ෂ සමඟ ආණ්ඩුවක් පිහිටුවීම ප්‍රතික්ෂේප කිරීමට ආසන්න ස්ථාවරයක අයිසන්කොට් පසුවන බැවින්, ඔහුගේ කණ්ඩායමට බහුතර බලයක් ලබාගැනීම අභියෝගයක් වී ඇත.

මේ අතර, නෙතන්යාහුට හිතවාදී චැනල් 14 ඇතුළු ඇතැම් ඊශ්‍රායල මාධ්‍ය ආයතන වාර්තා කර ඇත්තේ නෙතන්යාහුගේ පාර්ශ්වයට වඩාත් හොඳ ප්‍රතිඵලයක් ලැබෙනු ඇති බවයි. එම වාර්තාවලට අනුව ඔහුගේ පාර්ශ්වයට ආසන 60ක් හිමිවිය හැකිය.

ඡන්දය ප්‍රකාශ කිරීම සඳහා සුදුසුකම් ලැබූ ජනතාවගෙන් සියයට 77.7ක පිරිසක් ඡන්දය භාවිත කර ඇති බව ඊශ්‍රායල මැතිවරණ කොමිසම සඳහන් කර තිබේ. එය දශක දෙකකට වැඩි කාලයකදී වාර්තා වූ ඉහළම ඡන්දදායක සහභාගීත්වය වන අතර, 2022 මැතිවරණයට සාපේක්ෂව සියයට 7ක පමණ වැඩිවීමකි.

ඊශ්‍රායලයේ ආසන 120කින් සමන්විත පාර්ලිමේන්තුව වන නෙසෙට්හි ආණ්ඩුවක් පිහිටුවීම සඳහා සාමාන්‍යයෙන් අවම වශයෙන් ආසන 61ක සහාය අවශ්‍ය වේ. කිසිදු පක්ෂයක් තනිව එම ආසන සංඛ්‍යාව දිනාගෙන නොමැති බැවින්, සභාග ආණ්ඩු පිහිටුවීම එරට දේශපාලනයේ සාමාන්‍ය ක්‍රමය වී තිබේ.

ඊශ්‍රායල ප්‍රජාතන්ත්‍රවාදය පිළිබඳ ආයතනයේ සභාපති යොහානාන් ප්ලෙස්නර් පවසා ඇත්තේ, පිටවී ඇති ඡන්ද ප්‍රතිඵල අනුව නෙතන්යාහුගේ සන්ධාන ආණ්ඩුවේ ආසන සංඛ්‍යාව පෙර පාර්ලිමේන්තුවේ පැවති 68 සිට ආසන්න වශයෙන් 50 දක්වා පහත වැටීම ඔහුගේ පාර්ශ්වයට සැලකිය යුතු පසුබෑමක් බවයි.

එහෙත් අයිසන්කොට් පැහැදිලි ජයග්‍රාහකයකු ලෙස ඉස්මතු වී නොමැති බව ද ඔහු පෙන්වා දී තිබේ.

අවසන් ඡන්ද ප්‍රතිඵල නිකුත් වීමට දින කිහිපයක් ගතවිය හැකි බවත්, එම ප්‍රතිඵල පිටවීමේ ඡන්ද විමසීම්වලට සමාන වුවහොත් නෙතන්යාහු බලයෙන් ඉවත් කිරීම සඳහා අයිසන්කොට්ට සුළුතර ආණ්ඩුවක් පිහිටුවීමට උත්සාහ කළ හැකි බවත් ප්ලෙස්නර් සඳහන් කර ඇත.

කෙසේ වෙතත්, එවැනි ආණ්ඩුවක් දිගුකාලීනව පවත්වාගෙන යාමට හැකිවේද යන්න අවිනිශ්චිතව පවතින අතර, දේශපාලන අර්බුදය විසඳීමට නොහැකි වුවහොත් යළිත් මැතිවරණයක් පැවැත්වීමේ අවදානම ද මතුවිය හැකිය.

2023 ඔක්තෝබර් 7 වැනිදා හමාස් සංවිධානය ප්‍රමුඛ ප්‍රහාරයෙන් පසු ගාසා තීරය, ලෙබනනය සහ ඉරානය සම්බන්ධයෙන් යුද ගැටුම් ඇතිවීමෙන් අනතුරුව පැවැත්වෙන පළමු මැතිවරණය මෙය වීම ද විශේෂත්වයකි.

@sinhala.adaderana.lk