චීනය යළිත් නගරයක් වසා දමයි
කොරෝනා වෛරසයේ ව්‍යාප්තිය හේතුවෙන් චීනය යළිත් වරක් නගරයක් වසා දමා තිබේ.
එලෙස වසා දමා ඇත්තේ චීනයේ උතුරු දිග නගරයක් වන ෂියෑන් නගරයයි.
අද (23) මධ්‍යම රාත්‍රියේ සිට නගරය වසා දැමීමට නියමිත අතර එය කුමන කාලයක් බලපැවැත්වෙනවා ද යන්න මෙතෙක් ප්‍රකාශයට පත් කර නොමැති බවයි විදෙස් මාධ්‍ය වාර්තා සඳහන් කළේ.
ෂියෑන් නගරයේ පුද්ගලයින් මිලියන 13කට අධික පිරිසක් ජීවත් වන අතර නගරය වසා දැමීමත් සමග ඔවුන්ට දැඩි සීමාවලට යටත්වීමට සිදුවනු ඇත.
ඒ අනුව ෂියෑන් නගරයේ ජීවත්වන පවුල්වලින් එක් පුද්ගලයෙකුට පමණක් දින 02කට වරක් නිවසින් පිටතට පැමිණීමට අවසර හිමි වේ.
ඒ අත්‍යවශ්‍ය භාණ්ඩ මිලදී ගැනීම සඳහා පමණයි. නගරයේ පිහිටි අත්‍යවශ්‍ය නොවන සියලු ව්‍යාපාර ස්ථාන වසා දමා ඇති අතර රජයේ සේවකයින්ට දැනුම් දී ඇත්තේ නිවෙස්වල සිට රාජකාරී කටයුතු සිදුකරන ලෙසයි.
එළඹෙන පෙබරවාරි මාසයේ දී පැවැත්වීමට නියමිත 2022 සීත ඍතු ඔලිම්පික් උළෙල හේතුවෙන් කොරෝනා ව්‍යාප්තියෙන් තොර රටක් ගොඩනැගීම චීනයේ අරමුණ වී ඇත.
ඒ අනුව මේවනවිටත් රට පුරා කොරෝනා ආසාදිතයින් හඳුනා ගැනිමේ පරීක්ෂණ ක්‍රියාත්මක අතර ආසාදිතයින් වාර්තා වුවහොත් අදාළ ප්‍රදේශය වසා දැමීමේ දැඩි තීරණයක චීන බලධාරීන් සිටින බවයි විදෙස් මාධ්‍ය වාර්තා වැඩි දුරටත් සඳහන් කළේ.
