ස්වීඩනයේ අධ්‍යාපනයට විප්ලවීය වෙනසක් – ඩිජිටල් තිර ඉවතට, පොත්පත් දරුවන් අතට

ඩිජිටල් තිරවලින් වැසුණු පන්තිකාමර යළිත් පොතට, පෑනට සහ කඩදාසියට ගෙනෙන අධ්‍යාපනික වෙනසක් ස්වීඩනයෙන් ආරම්භ කර ඇතැයි වාර්තා වෙයි. ගෝලීය වශයෙන් තාක්ෂණයේ ඉහළම ප්‍රතිලාභ ලබන රටක් වන ස්වීඩනය, සිය පාසල් පද්ධතිය තුළ ක්‍රියාත්මක වූ අධි-ඩිජිටල්කරණ ක්‍රියාවලිය (Hyper-digitalization) ආපසු හැරවීමට තීරණය කර තිබෙන බවයි වාර්තා වන්නේ. පන්තිකාමර තුළ භාවිත කළ ටැබ්ලට් පරිගණක සහ ලැප්ටොප් වෙනුවට යළිත් සාම්ප්‍රදායික මුද්‍රිත පොත්, පෑන සහ කඩදාසි වෙත නැඹුරු වීමේ දැවැන්ත වැඩපිළිවෙළක් එර රට රජය විසින් ආරම්භ කර ඇත.

ස්වීඩන සිසුන්ගේ කියවීමේ සහ ලිවීමේ හැකියාවන් මෙන්ම සාක්ෂරතා මට්ටම පහත වැටීමට පන්තිකාමර තුළ පරිගණක තිර (Screens) අධික ලෙස භාවිත කිරීම සෘජුවම බලපා ඇති බව පර්යේෂකයන් පෙන්වා දීමෙන් අනතුරුව මෙම පියවර ගෙන තිබේ.

WION නාලිකාවේ ශ්‍රෙයා උපධ්‍යාය (Shreya Upadhyaya) ගෙන එන ජාත්‍යන්තර පුවත් වාර්තාවකට අනුව, මෙම නව අධ්‍යාපන ප්‍රතිසංස්කරණයේ ප්‍රධාන කරුණු කිහිපයක් යටතේ සිදු කෙරෙයි.

මෑත කාලීන ජාත්‍යන්තර ඇගයීම්වලදී (PISA සහ PIRLS වැනි) ස්වීඩන සිසුන්ගේ කියවීමේ සහ ගණිතමය හැකියාවන් පෙර වසරවලට සාපේක්ෂව පහත වැටී ඇති බව නිරීක්ෂණය වී ඇත. ඩිජිටල් තිර හරහා කියවීමට වඩා මුද්‍රිත පොතක් ඇසුරින් කියවීමෙන් මතකය සහ අවධානය රඳවා ගැනීම ඉහළ මට්ටමක පවතින බව විද්‍යාත්මකව තහවුරු වී තිබේ.

සෑම සිසුවෙකුටම සෑම විෂයයක් සඳහාම නිල මුද්‍රිත පෙළපොතක් ලබා දීම සහතික කිරීම වෙනුවෙන් ස්වීඩන රජය ඩොලර් මිලියන සිය ගණනක ප්‍රතිපාදන වෙන් කර ඇත.

මුද්‍රිත පෙළපොත් සහ අත් අකුරින් ලිවීම (Handwriting) මූලික කරගත් නව ජාතික විෂය නිර්දේශයක් ද ක්‍රියාවට නැංවීමට සැලසුම් කර තිබේ.

අධ්‍යාපන කටයුතු සඳහා වුවද පන්තිකාමර තුළ ජංගම දුරකථන භාවිත කිරීම සම්පූර්ණයෙන්ම තහනම් කිරීමට ස්වීඩන බලධාරීන් පියවර ගනිමින් සිටී. විශේෂයෙන්ම අවුරුදු දෙකට අඩු දරුවන්ට ඩිජිටල් තිර නිරාවරණය කිරීම වැළැක්වීමට ද උපදෙස් දී ඇත.

විද්‍යාඥයන් සහ ස්වීඩනයේ කරොලින්ස්කා පර්යේෂණ ආයතනය (Karolinska Institute) පෙන්වා දෙන්නේ, පන්තිකාමර තුළ තාක්ෂණය අධික ලෙස භාවිත කිරීම නිසා දරුවන්ගේ අවධානය බිඳවැටෙන අතර, එය මොළයේ වර්ධනයට මෙන්ම තොරතුරු ග්‍රහණය කරගැනීමේ හැකියාවට ද බාධා පමුණුවන බවයි.

තාක්ෂණය මුළුමනින්ම ප්‍රතික්ෂේප කිරීම මෙහි අරමුණ නොවන නමුත්, මූලික සාක්ෂරතාව සහ ලේඛන හැකියාව ස්ථාවර කරගැනීම සඳහා සාම්ප්‍රදායික ක්‍රමවේද අත්‍යවශ්‍ය බව ස්වීඩන අධ්‍යාපන බලධාරීන්ගේ ස්ථාවරය වී තිබේ. ඩිජිටල්කරණය පසුපස පමණක්ම හඹා යන සෙසු රටවලට ද ස්වීඩනයේ මෙම පසුබැසීම සහ ‘නැවත මුලට පැමිණීමේ (Back to basics)’ ප්‍රතිපත්තිය වැදගත් පාඩමක් කියා දෙන්නක් බව WION නාලිකාවේ ශ්‍රෙයා උපධ්‍යාය සඳහන් කරයි.