කොළඹ රිමාන්ඩ් බන්ධනාගාරයේ යකඩ කූරු අතරින් මම ඔබව දකිමි – නාමල් කියයි
ආණ්ඩුවේ වියරු දේශපාලන බලයට තමා කිසිසේත් යටත් නොවන බවත් තම අධිෂ්ඨානය සිරගත කළ නොහැකි බවත් ශ්රී ලංකා පොදුජන පෙරමුණේ ජාතික සංවිධායක නාමල් රාජපක්ෂ මහතා සඳහන් කරයි.
ශ්රී ලංකා පොදුජන පෙරමුණ විසින් ජනපීඩක ආණ්ඩුවේ රුඳුරු බල බිඳින ජන සටන අනුරාධපුරයේදී පසුගිය 12දා පැවැති ජනහමුවට රිමාන්ඩ් බන්ධනාගාරයේ සිට නාමල් රාජපක්ෂ මන්ත්රීවරයා එවන ලද ලිපියේ එසේ සඳහන් කර තිබේ.
මෙම රැලිය සඳහා හිටපු ජනාධිපති මහින්ද රාජපක්ෂ මහතාද එක්ව සිටි අතර ජාතික පිවිතුරු හෙළ උරුමය පක්ෂයේ නායක උදය ගම්මන්පිල, හිටපු අමාත්ය විමල් වීරවංශ, ටිරාන් අලස් යන මහත්වරුද සහභාගි වී සිටියහ.
නාමල් රාජපක්ෂ මහතා එවා තිබූ එම ලිපිය හිටපු පාර්ලිමේන්තු මන්ත්රී සංජීව එදිරිමාන්න මහතා විසින් ඉදිරිපත් කළේය.
‘කොළඹ රිමාන්ඩ් බන්ධනාගාරයේ යකඩ කූරු අතරින් මම ඔබව දකිමි. ඔබ විසින් මා වෙත පළ කරන මේ ළෙන්ගතු සහෝදරත්වයේ උණුසුම මම මෙහි සිට අත්විඳිමි. ඔබගේ මේ උද්යෝගිමත් සහයෝගය මට ඉමහත් ආස්වාදයකි. මේ අභියෝගාත්මක මොහොතට මම ඉතා ශක්තිමත්ව මුහුණ දෙමි. ඔබ වැනි වීරවන්තයන් සහිත දේශපාලන ව්යාපාරයක් මෙහෙයවීමට ලැබීම මා ලද භාග්යයකි. ජන සටන මහ රැලිය මෙරට පොදුජන සටන් ව්යාපාරයේ තීරණාත්මක අලුත් ආරම්භයක් වනු ඇත. අපි මේ අවතීර්ණ වී සිටින්නේ යුගයේ යුක්ති සහගතම දේශපාලන සටන් අවකාශය වෙතටයි. ඔබ මා සමඟ එක්වනු ඇතැයිද එහි සඳහන් කර තිබිණි. ශ්රේෂ්ඨ ලෝක නායකයකු වූ නෙල්සන් මැන්ඩෙලා රොබන් දූපත් සිරමැදිරියේ සිට ලියූ ලිපියක තිබී මෙසේ ලියා තිබුණි: ‘දුෂ්කරතා ඇතැමුන්ව බිඳ දමයි, එහෙත් දුෂ්කරතා විසින් ඇතැමුන්ව ගොඩනඟනු ලබයි.’ අප දුෂ්කරතා හමුවේ තව තවත් ශක්තිමත් වන මිනිසුන්ය. අභියෝග අබියසදී අප වඩාත් ශක්තිමත් වීමේ පාඩම මට කියා දුන්නේ මගේ ආදරණීය තාත්තාය. ජනවරමට ගරු කිරීම, ප්රතිපත්තිවලට වගවීම, තීරණවලට හේතු දැක්වීම ආණ්ඩුකරණයේදී නොසලකා හැරිය නොහැකිය. එහෙත් මේ ආණ්ඩුවට එවන් සදාචාරයක් නැත. වර්තමාන මාලිමා ආණ්ඩුව කිව්දේ නොකරයි, නොකියූ දේ කරයි. රටේ සමස්ත පුරවැසි සමාජයේත් සැබෑ අභිලාෂ නොතකා සිටී. මෙය රටක දේශපාලනයේ ප්රතිපත්තිමය විශ්වසනීයත්වය බිඳ දැමීමකි.
මෙම ආණ්ඩුවේ ධුර කාලයෙන් තුනෙන් එකක් දැන් අවසන්ය. ඔවුන් විසින් සපථ කළ දියුණු ආර්ථිකය, සුව පහසු ජීවිතය, අලුත් සමාජ දේශපාලන පරිවර්තනය හුදු ප්රබන්ධයක් පමණි. කිසිදු පුරවැසි ආයාචනයකට මාලිමා ආණ්ඩුව සාධාරණ ප්රතිචාරයක් දක්වා නැත.
තමන්ගේ දහඩිය මහන්සියට සාධාරණ ඉල්ලා සිටි ගුරුවරුන්ට මේ ආණ්ඩුව දුන් බාල අන්වර්ථ නාමය ඔබට අමතක නැත. සාධාරණ ඉල්ලීම් සහිත කම්කරු සටනකට පිළිතුරු ලෙස අදාළ ආයතනය වසා දැමූ ආණ්ඩුවක් ගැන ඔබ මීට පෙර අසා තිබුණාද? තෙල්මිල, විදුලිමිල, වී මිල සහ හාල් මිල ගැන මේ තරම් බොරු පොරොන්දු දුන් ආණ්ඩුවක් තවදුරටත් බලයේ සිටිය යුතුද? බදු බර අඩු කරන බවට, ආහාර ද්රව්ය සහ පාසල් උපකරණ සියලු බදුවලින් නිදහස් කරන බවට පොරොන්දු දුන් ආණ්ඩුවට අද කිසිවක් ගැන වගේ වගක් නැතැයිද දක්වා තිබේ.
ආදරණීය මිත්රවරුනි, ආණ්ඩුවේ දේශපාලන බලවතුන් සියලු දෙනා සිටින්නේ නීතියට ඉහළිනි. නීතියට ඉහළින් කිසිවෙක් නැත යන්න මේ ආණ්ඩුව යටතේ තවදුරටත් වලංගු නැත. මෙම ආණ්ඩුව පොරොන්දු වූයේ අලුත් ආණ්ඩුක්රම ව්යවස්ථාවක් සම්පාදනය කර ජනමත විචාරණයකින් එය සම්මත කර ගන්නා බවයි. විධායක ජනාධිපති ධුරය අහෝසි කරන බවටත්, අගමැති ප්රමුඛ පාර්ලිමේන්තු ආණ්ඩුක්රමයක් ස්ථාපිත කරන බවටත්, අලුත් මැතිවරණ ක්රමයක් හඳුන්වා දෙන බවටත් එදින පොරොන්දු වී තිබුණි. පළාත් සභා මැතිවරණය පිළිබඳවද ආණ්ඩුව සාහසික ලෙස නිහඬව සිටී. යුක්තිය, සාධාරණය, නීතියේ ආධිපත්යය සහ ප්රජාතන්ත්රවාදී හරයන් ලෙස නොසලකමින් ආණ්ඩුව අලුත් ව්යවස්ථා සංශෝධනයක් කරළියට රැගෙනවිත් තිබේ.
කිසිවකු පිළිබඳ අපට වෛරයක් නැත. එහෙත් මේ සමාජ, ආර්ථික, දේශපාලන ව්යසනයට එරෙහිව අප සටන් කළ යුතු යුතුව ඇත. ජයග්රහණය පිළිබඳ විශ්වාසයෙන් අපි ඉදිරියටම යමු. නොබියව වීරවන්තව සටන් කරමු. එය උපන් නූපන් සියල්ලන් වෙනුවෙන් අප වෙත පැවරුණු වගකීමයි. අභියෝග ජයගත හැකි දැවැන්ත මහජන බලවේගයක් ගොඩනඟමු. අපි සාමකාමී වෙමු, විනයගරුක වෙමු, නීතිගරුක වෙමු. මේ ඉතිහාසගත ජනසටන ජයග්රහණය අවසන් කරමු. මාගේ හෘදයාංගම ස්තුතිය භාරගන්නා ලෙස ආදරයෙන් ඉල්ලා සිටිමි; යැයිද එහි සඳහන් කර ඇත.
මෙහිදී අදහස් දැක්වූ ශ්රී ලංකා පොදු ජන පෙරමුණේ අම්පාර දිස්ත්රික් හිටපු පාර්ලිමේන්තු මන්ත්රී ඩබ්ලිව්.ඩී. වීරසිංහ මහතා,
“එදා අවුරුදු තිහක් මේ රටේ තිබුණු යුද්ධය මාවිල් ආරුවලින් පටන් අරගෙන නන්දිකඩාල් කලපුවෙන් ඉවර කළේ දුටුගැමුණු රජතුමා වගේ රුහුණෙන් ආපු අපේ අදටත් හදවතේ ජනාධිපති මහින්ද රාජපක්ෂ මැතිතුමායි.
අද ගොවියගේ වී ටික විකුණගන්න බෑ රුපියල් 80යි 85යි වී ටික. අද ගොවියෝ වහ බොන තැනට ඇවිල්ලා.
අද පොලොන්නරුවේ ගොවි රැලියක් පවත්වනවා. ජනාධිපතිතුමනි, දැන් ගොවි සම්මේලන ඕනේ නෑ. ඔබතුමාට ඇති වෙන්න බලය මේ රටේ ගොවියෝ දුන්නා. දැන් මේ ගම්වල ගිහිල්ලා රැස්වීම් තිය තිය ඉන්නෙ නැතුව, අර ඒ කාලේ ඔබතුමාගේ ගමේ ඇවිල්ලා, අපේ ගොවි අම්මා තාත්තා එක්ක පිදුරු කාපු, අපේ ගොවියෝ එක්ක ගොයම් ටික කාපු, අපේ ගොවියොත් එක්ක මඩ කාපු, අයට අද ගොවිකම අමතක වෙලා,.
ලාල්කාන්තයි වඳුරෝ ගණන් කරපු ඇමැතියි කොළඹට ඇවිල්ලා, කෝට් එක ඇඳලා අද කූල් කාමරේ ඉන්නවා, දුක් විඳින ගොවියගේ ප්රශ්නේ කතා කරන්නේ නැහැ.
ඒක නිසා අපි ඉල්ලනවා ජනාධිපතිතුමනි, මහ බැංකුව පිරී ඉතිරි ගිහිල්ලලු. ඕක මේ රටේ ව්යාපාරිකයන්ගෙන් ඇහුවොත් කියයි. හැමෝටම ගහන්න තියෙන බදු ඔක්කොම ගහලා, සුද්දා ගහපු තන බද්ද ඇර ඉතුරු බදු ඔක්කොම ගහලා, මේ රටේ මිනිස්සු හූරාගෙන කාලා, භාණ්ඩාගාරය පිරෙව්වට වැඩක් නෑ. මේ ආණ්ඩුවෙනුත් අවුරුදු දෙකක් ගතවෙලා ඔබ තමුන්නාන්සේලා ගොවියට කරපු කෙන් ගෙඩියක් තියෙනවද කියලා.”
ශ්රී ලංකා පොදු ජන පෙරමුණේ අනුරාධපුර දිස්ත්රික් නායක, හිටපු පාර්ලිමේන්තු මන්ත්රී තිස්ස කුට්ටිආරච්චි මහතා,
“ජේවීපී මිත්රවරුනි ප්රහාරය අශිෂ්ට නම්, ප්රතිප්රහාරයේ ශිෂ්ටත්වය හොයන්න එපා කියලා ඉගැන්නුවේ ඔබලාගේ දේශපාලන නායකයන් තමයි. අද මහා සංඝරත්නය සිය ගාණක් වැඩම කරලා ඉන්නේ ශාසනික ප්රශ්නයක් තියෙන නිසා, ගොවියෝ ලක්ෂ ගාණක් ඇවිල්ලා ඉන්නේ ගොවියාට කෘෂිකර්මය පිළිබඳ ප්රශ්නයක් තියෙන නිසා. සඟ, වෙද, ගුරු, ගොවි, කම්කරු සියලු දෙනාට සහ දේශපාලන නායකයන්ට අශිෂ්ට ප්රහාර එල්ල කරන ගමන්, තිස්ස කුට්ටිආරච්චි කතාව ඇතුළේ ශිෂ්ටත්වය හොයන්න එන්න එපා කියන එක බොහෝම තරයේ මතක් කරනවා.
නාමල් රාජපක්ෂ මහතාගේ ආණ්ඩුවක් හදපු දවසට, අනුරාධපුරේ පළමුවැනි පොරොන්දුව දෙන්න මගේ අහිංසක ගොවි ජනතාව වෙනුවෙන්, කන්න තුනකට ඇතිවෙන්න තෙල් පොහොර ස්ටොක් එකක් ලබා දෙන්න කියලා ඉල්ලනවා. අනුරාධපුර අටමස්ථානය එළි වෙනකම් වඳින්න පුදන්න පුළුවන් පූජා භූමියක් කරන්න කියලා ඉල්ලනවා. හැම සෙනසුරාදාම රුවන්වැලි සෑ මහා සෑයට රාජ්ය අනුග්රහයෙන් පූජාව පවත්වන අතරේ, අටමස්ථානයේ ශබ්ද පූජාව අපිට අරගෙන දෙන්න කියලා කියන කාරණාවත් ඔබට මතක් කරන ගමන් තව දෙයක් කියන්න ඕනේ, මේ වන විට කිලෝමීටර් ගාණක් ඈත එළියේ ඔබ වගේම ජනතාවක් එළියේ ඉන්නවා ආඩම්බරයෙන් කියන්න කැමතියි, අනුර මහත්තයෝ එකෙක් හිර ගෙට දාන්න, එම සැණින් දහයක් නැඟිටිනවා, දහයක් හිරේ දාන්න ඊළඟ පසු පෙළේ නායකයෝ සීයක් නැඟිටිනවා. මුළු රටම හිරගෙයක් බවට පත් කළහොත් මිස, ඔබට හිරේ දාලා ඉවර කරන්න බෑ කියන එකයි අපේ අභියෝගය.”
මෙහිදී අදහස් දැක්වූ හිටපු අමාත්ය විමල් වීරවංශ මහතා
“කොටි බෙදුම්වාදී සංවිධානය යුදමය වශයෙන් පරාජය කරපු ජනාධිපති මහින්ද රාජපක්ෂ ඇතුළු ඒ කටයුත්තට හවුල් වෙච්ච ආරක්ෂක හමුදා ප්රධානීන්, මේජර් ජෙනරාල් සලේලා, නිශාන්ත උලුගේතැන්නලා, කරන්නාගොඩලා ඊයේ පෙරේද සීඅයිඩී එකට යනවා මම දැක්කා. රොෂාන් ගුණරත්න, යුද්ධය වෙලාව හිටපු මේ ගුවන් හමුදාපති. මේ තමයි එයා කියන කළු රාජ්යයේ කට්ටිය. වෙන කවුරුත් නෑ. සලේ අයිති කළු රාජ්යයට. නිශාන්ත උලුගේතැන්නලාව දාල තියෙන්නේ ඒ කළු රාජ්යයට. කරන්නාගොඩලා උසාවි අරන් යන්නේ, දාලා තියෙන්නේ ඒ කළු රාජ්යයට. එදා ඒ සටනට වචනයකින් හරි දායක වෙච්ච මිනිහෙක් ඉන්නවා නම්, ඒ හැමෝගෙන්ම පළිගැනීමේ නැරැටිව් එක තමයි, මුන් ඔක්කොම අයිති කළු රාජ්යයට කියලා කියන එක. මේ කළු රාජ්යයට මහ බැංකු බැඳුම්කර හොරු අයිති නෑ. මලික් සමරවික්රම මහ බැංකු හොරකමේ ප්රධාන චුදිතයෙක්. ඒ අය කළු රාජයේ නැහැ.
මහ බැංකු හොරකමට චෝදනා ලබපු මලික් කළු රාජ්යයට අයිති නැහැ. රනිල් ගාව හිටපු ක්රිෂාන්ත කුරේ, ඩීල් ක්රිෂාන්ත ඒගොල්ලෝ කළු රාජ්යයට අයිති නැහැ.
හොයාලා බලන්න රිෂාඩ් බදුර්දීන්. රිෂාඩ් බදුර්දීන් තිබිච්ච හැම ආණ්ඩුවකම ඇමැතිකම් දැරුවා. ඕන තරම් චෝදනා තියෙනවා. අඩු ගාණේ දඩයම් මන්දිරයට එක දවසක් ගෙන්නනවාද? නැහැ. මේ පළිය ගන්නේ, මේ වාඩුව ගන්නේ, LTTE ඩයස්පෝරාව සල්ලි දුන්නා කියලා අර්ජුන මන්ත්රීතුමා මෙතන කිව්වා. ඕක අපි කිව්වමනේ පිළිගන්නේ නැත්තේ. එතුමා දන්නවා එතුමා කිව්වා.”
මෙහිදී අදහස් දැක්වූ පිවිතුරු හෙළ උරුමයේ නායක උදය ගම්මන්පිල මහතා
“මම මේ වේදිකාවට ගොඩ වුණේ ආරාධිත කථිකයෙක් විදියටයි. අපි අද ඔබේ වේදිකාවට ආවේ පදනම් විරහිතව අයුක්තිසහගතව නාමල් රාජපක්ෂ මන්ත්රීතුමා සිරගත කිරීමට අපේ රටේ බුරබුරා නැඟෙන විරෝධය පළ කරන්නටයි.
ලෝකයේ තියෙනවා ලොකුම ගුවන්යානා සමාගම් දෙකක්, බෝයින්, එයා බස්, මේ ගුවන් යානා විකුණගන්න ඒගොල්ලන්ගේ තරගය නිසා ගුවන් සමාගම්වලට කොමිස් දෙනවා. 2013-2015 අතර එයාබස් සමාගම ගුවන් සමාගම්වල ලොක්කෝ 5 දෙනකුට අල්ලස් දුන්නා, කොමිස් මුදලක් දුන්නාය කියලා හොයා ගන්නවා.
මේ ගුවන් සමාගම් පහෙන් එකක් තමයි ශ්රී ලන්කන් එයාර්ලයින්. ශ්රී ලංකන් එයාර්ලයින් එකේ ලොක්කෙකුටත් කොමිස් එකක් දීලා. එයා ඒක ගෙනැවිත් තියෙන්නේ තමන්ගේ බිරියගේ නමින් ‘ඩිස්සොලුෂන්’ කියලා සිංගප්පූරුවේ බැංකු ගිණුමකට. ඒ ලැබිච්ච කොමිස් එකෙන් ලොකු කුට්ටියක්, ඩොලර් ලක්ෂ 8ක් යනවා ඔස්ට්රේලියාවේ ඉන්න නිමල් පෙරේරාගේ ගිණුමට. දැන් ඔන්න මිත්රවරුනි, අපේ පොලීසියයි, අල්ලස් එකේ උදවියයි නිමල් පෙරේරාගෙන් මේ ගැන ප්රශ්න කරන්න ඔස්ට්රේලියාවට යනවා. අපි හිතුවේ අර මාකඳුරේ මධුෂ් ගෙනාවා වගේ, කෙහෙල්බද්දර පත්මේ ගෙනාව වගේ නිමල් පෙරේරා කුදලගෙන ලංකාවට ගෙනෙයි කියලා. හැබැයි මොකද වුණේ? නිමල් පෙරේරා ලවා ලියව ගන්නවා ‘මට හම්බවෙච්ච සල්ලි මම නාමල්ට දුන්නා’ කියලා. නාමල්ට දුන්නා කියන්න කිසිම සාක්ෂියක් නෑ. අඩුම ගානේ දුරකතන ඇමතුමක් නෑ. සීසීටීවී දර්ශනයක් නෑ. ඒ විතරක් නෙවෙයි මිත්රවරුනි, ඔය දුන්නා කියන මුදල ගත්ත බැංකුවකුත් නෑ. කිසිම සාක්ෂියක් නැතුවයි නාමල් රාජපක්ෂ මහත්තයාව අත්අඩංගුවට අරන් තියෙන්නේ.”
ශ්රී ලංකා පොදු ජන පෙරමුණේ මහ ලේකම් නීතිඥ සාගර කාරියවසම්,
“මේ රටේ ගොඩක් දේවල් වැඩි කළා අපේ ජනාධිපති මහින්ද රාජපක්ෂ මැතිතුමා. ඔබතුමා මේ රටේ වරායවල් වැඩි කළා. ඔබතුමා මේ රටේ ගුවන්තොටුපළවල් වැඩි කළා. ඔබතුමා මේ රටේ මහමාර්ග වැඩි කළා. පාසල් වැඩි කළා. විදුලි බලාගාර වැඩි කළා. විශ්වවිද්යාල වැඩි කළා.
ඒ විතරක් නෙමෙයි, මේ රටේ මහ පොළවත් වැඩි කරලා, රටේ සිතියම අලුතෙන් ඇන්දුවා.
වත්මන් ජනාධිපතිතුමාත් මේ රටට වැඩ කළා.
එතුමා රටේ වැඩි කරපුව මොනවාද? මේ රටේ දුප්පත්කම වැඩි කළා. මේ රටේ විරැකියාව වැඩි කළා. මේ රටේ සම්පූර්ණ සමාජය විනාශ කළා. මේ රටේ ත්රස්තවාදය නැවත වැඩි කළා. පාරක් පාරක් ගානේ වෙඩි තියන. බෝම්බ ගහන සමාජයක් ඇති කළා.
අපේ සිංහල කතාවක් තියෙනවා, ‘තල වැපිරුවොත් තල නෙළා ගන්න පුළුවන්, මුං වැපිරුවොත්, මුං නෙළා ගන්න පුළුවන්’ කියලා. නාමල් රාජපක්ෂ කියන ඒ තරුණ නායකයාගේ ඒ දර්ශනය ඔබට නවත්වන්න බැහැ. ඒ ගමන ඔබට නවත්වන්න බැහැ. ඔහුගේ මේ රට වෙනුවෙන් තියෙන ඒ දැවැන්ත වැඩපිළිවෙළ හිරගෙවල්වල දාලා ඔබට නවත්වන්න බැහැ.”
පාර්ලිමේන්තු මන්ත්රී වෛද්ය අර්චුනා රාමනාදන්
“මම උතුරේ ඉපදිච්ච එක්කෙනෙක්. මම කොටියෙක් විදිහට කියන්නෙ මගේ අවුරුදු 40ම උතුරේ ජීවත් වෙච්ච කියන්න කැමතියි සිංහල ජනතාව කියලා කියනකොට මට මතක් වෙන්නේ මහින්ද රාජපක්ෂ මහත්මා විතරයි. වෙන කවුරුත් නැහැ. මම අවුරුදු 40ක් දේශපාලනය කරලා නැහැ. මට මේ දේශපාලනය කරන්න ඕනේ නැහැ. මම එකක් කියන්නම්, මම නාමල්ට කිව්වා මචං උඹ 2029 ජනාධිපති වෙනවාමයි. ඒක මම දන්නවා. ඒ කාලේ ඔබතුමාට මාව මතක නැතිව ඇති, හැබැයි මම එකක් කියන්නම්, මෙතන ඉන්න සිංහල ජනතාවයි, උතුරේ ඉන්න දෙමළ ජනතාවයි, ඕගොල්ලෝ එකතු කරනවානම්, එතන මචං මම ඉන්නවා කියලා.
මම ඩොක්ටර් වෙලා ඉන්නකොට එක නඩුවක්වත් මට තිබුණේ නැහැ. හැබැයි මේ දේශපාලනයට ආවට පස්සේ අපේ ජනාධිපතිතුමා මට නඩු විසි නවයක් දැම්මා” යැයි කීවේය.
ඉත්තෑකන්දේ සද්ධාතිස්ස හිමිපාණන්ද ශ්රී ලංකා පොදු ජන පෙරමුණේ බෙන්තර ඇල්පිටිය ප්රධාන සංවිධායක හිටපු අමාත්ය වෛද්ය රමේෂ් පතිරණ මහතාද අදහස් පළ කළහ.
@දිනමිණ
Discover more from cmn.lk
Subscribe to get the latest posts sent to your email.
