අමෙරිකානු බෝම්බ හෙලන යානා බ්‍රිතාන්‍යයෙන් ඉවත් කරගනී
බ්‍රිතාන්‍යයේ RAF Fairford ගුවන් හමුදා කඳවුරේ රඳවා තිබූ අමෙරිකානු B-1 වර්ගයේ බෝම්බ හෙළන ගුවන් යානා ඉරානයට සම්බන්ධ තර්ජනයක් හේතුවෙන් හදිසියේ ඉවත් කර ගැනීමට අමෙරිකානු ජනාධිපති ඩොනල්ඩ් ට්‍රම්ප් නියෝග කර තිබේ. යුරෝපා කලාපයේ අමෙරිකානු බෝම්බ හෙළන යානා සඳහා බොහෝවිට යොදාගන්නා මෙම කඳවුර, මෑතකදී ඉරානයට එල්ල කළ ප්‍රහාර සඳහා ද යොදාගනු ලැබීය. කෙසේ වෙතත්, ඉරාන විප්ලවීය ආරක්ෂක බළකාය මීට පෙර ප්‍රකාශ කර තිබුණේ මෙම කඳවුර නීත්‍යානුකූල ඉලක්කයක් බවයි.
පසුගිය සතියේ මෙම කඳවුර අසලින් ත්‍රස්තවාදී ක්‍රියා සූදානම් කළ සැකපිට බ්රිතාන්ය ජාතිකයන් පස් දෙනෙකු අත්අඩංගුවට ගැනීමත් සමඟ මෙම තත්ත්වය උද්ගත විය. ‘අපට යම් තර්ජනයක් ගැන තොරතුරු ලැබුණා, මම ඒවා එහි තබන්නේ ඇයි? ඒවා වෙනත් තැනකට ගෙන යාමට වැය වන්නේ ඉතා කුඩා මුදලක්,’ යැයි ජනාධිපති ට්‍රම්ප් මාධ්‍යවේදීන්ට පවසා ඇත. එම තර්ජනය පිටුපස ඉරානය සිටින බවට විශ්වාස කරන බවත්, තර්ජන හමුවේ තවදුරටත් අවදානම් නොගෙන යානා ඉවත් කරගත් බවත් ඔහු වැඩිදුරටත් සඳහන් කළේය.
කෙසේ වෙතත්, අමෙරිකානු රාජ්‍ය ලේකම් මාර්කෝ රුබිඕ ප්‍රකාශ කළේ බෝම්බ හෙළන යානා හදිසියේ ඉවත් කර ගැනීම සහ ඉරාන කුමන්ත්‍රණය අතර සෘජු සම්බන්ධයක් නොමැති බවයි. අමෙරිකානු කඳවුරුවල ආරක්ෂාව පිළිබඳව පූර්ණ විශ්වාසයක් ඇති බවද ඔහු අවධාරණය කළේය. ඒ අතරතුර, බ්රිතාන්ය අග්‍රාමාත්‍ය ඇන්ඩි බර්නම් ප්‍රකාශ කර ඇත්තේ මෙම සැක සහිත කුමන්ත්‍රණය පිටුපස ඉරානයේ අනුග්‍රහය තිබෙන්නට ඇති බවට විශ්වාස කරන බවයි.
මෙම චෝදනා සම්පූර්ණයෙන්ම ප්‍රතික්ෂේප කර ඇති ඉරාන විදේශ අමාත්‍ය අබාස් අරාක්ෂි, විදේශීය රාජ්‍යයන් වෙනුවෙන් වැඩ කරන බවට සැක කෙරෙන ප්‍රබන්ධ ත්‍රස්තවාදීන් මුදා හැරීම තුළින්ම සියල්ල පැහැදිලි වන බව පවසා ඇත. එසේම, ඉරානය සම්බන්ධයෙන් එල්ල කර ඇති චෝදනා පදනම් විරහිත බව ඔහු අවධාරණය කළේය.
මෙම ආරක්ෂක ගැටලු හේතුවෙන් ඇමරිකාව සහ බ්‍රිතාන්‍යය අතර පවතින සබඳතා යම්තාක් දුරකට තදබදයකට ලක්ව තිබේ. මන්ද යත්, වත්මන් ගැටුම්කාරී තත්ත්වය හමුවේ බ්‍රිතාන්‍යය අවසර දී තිබුණේ හෝමූස් සමුද්‍ර සන්ධියේදී නාවික යාත්‍රාවලට ප්‍රහාර එල්ල කළ ඉරාන මිසයිල මධ්‍යස්ථාන වෙත ආරක්ෂක ප්‍රහාර එල්ල කිරීමට පමණක් වන අතර, ඉරානයට එරෙහි ආක්‍රමණශීලී ප්‍රහාර සඳහා බ්රිතාන්ය කඳවුරු භාවිත කිරීමට ලන්ඩන් රජය අවසර ලබා දී නොතිබුණි.
පෙන්ටගනය තහවුරු කර ඇත්තේ Fairford කඳවුරේ යොදවා තිබූ සියලුම අමෙරිකානු බෝම්බ හෙළන යානා අමෙරිකාවේම පිහිටි ඒවායේ මූලස්ථාන වෙත ආපසු ගොස් ඇති බවයි. ආරක්ෂක විශේෂඥයන් පෙන්වා දෙන්නේ මෙම යානා ඉවත් කරගැනීම නිසා කෙටිකාලීනව ඉරානයට එරෙහිව ගුවන් මෙහෙයුම් ඉක්මනින් දියත් කිරීමේ අමෙරිකානු හැකියාව අඩුවන බවයි. කෙසේ වෙතත්, නේටෝ සංවිධානය ප්‍රකාශ කර ඇත්තේ මෙම යානා ඉවත් කරගැනීම සංවිධානයේ ආරක්ෂක සූදානමට කිසිදු බලපෑමක් නොකරන බවයි
@දිනමිණ
Discover more from cmn.lk
Subscribe to get the latest posts sent to your email.
